အပျိုကြီးနှင့် လက်ထပ်မင်္ဂလာ

ပေါ်တီကိုအောက်မှာကားရပ်ပြီး အိမ်ထဲဝင်ဝင်ချင်း သူ့ ခြေသံကြားတာနဲ့  အချစ်တော်လေး ကီကီက ထုံးစံအတိုင်း အပြေးလာကြိုသည်... မွေးစုတ်ဖွားလေးတွေကို သပ်ပေးရင်း ထုံးစံမပျက် လက်ထဲက၀ယ်လာတဲ့ ငါးဖယ်ကြော်တွေ ချကျွေးနေစဉ် အခန်းထဲမှ တူမချော မီးလုံး၏ အသံစာစာကို ကြားလိုက်ရသည်။

"တီသု ပြန်လာပြီလား... နေ့ လည်က အန်တီနန္ဒာ လာသွားတယ်... တီသု မရှိလို့  ဖိတ်စာပေးသွားတာနဲ့  ဧည့်ခန်းထဲက စားပွဲပေါ်မှာ သမီးတင်ထားတယ်နော်..."

အမယ်... ဖိတ်စာ ဆိုပါလား... ဒင်းက ဖိတ်စာတောင် ဝေနေပြီကိုး။ အင်းလေ... ဒင်းပြောတဲ့ရက်ဆို နောက်နှစ်ပတ်လောက်ပဲ လိုတော့တာပဲ... လူကိုယ်တိုင်တောင် လာမဖိတ်နိုင်လောက်အောင် ဒင်းက မျက်နှာပူတယ်ပေါ့လေ။ ငါဘယ်အချိန် အိမ်ပြန်ရောက်တတ်လဲသိရဲ့ သားနဲ့  နေ့ လည်ဘက်လာပေးတယ်ဆိုတော့ ဒါ ငါ့ကိုတမင်သက်သက်ရှောင်တယ်ဆိုတာ အသိသာကြီးပါ မိနန္ဒာရယ်...။ နှုတ်ခမ်းကိုမဲ့ရင်း စားပွဲပေါ်က ဖိတ်စာဝါ၀ါလေးကို လက်လှမ်းလိုက်ကာ ပါးစပ်မှလဲ 'အလကားမိန်းမ... သစ္စာဖောက်မ...' ဟု ဘယ်နှကြိမ်မြောက်မှန်းမသိ ပွစိပွစိရွတ်လိုက်သည်... ဖိတ်စာက သုံးစောင်တောင်ပါလား... ဒါက ဖေဖေနဲ့ မေမေ... ဒါက မမတို့ စုံတွဲ... ပြီးတော့ ဒါက... ဘာ... ကြည့်စမ်း ကြည့်စမ်း... စော်ကားလိုက်တာ... လူကိုများ... စာအိတ်ပေါ်မှာ မှင်အနက်ရောင်နဲ့ ရေးထားတာ 'ဒေါ်သုသုသွေး' ဆိုပါလား... ဒေါသတကြီးနဲ့  စာအိတ်ထဲက ဖိတ်စာကို အလောတကြီးဖွင့်ကြည့်လိုက်တော့ 'မောင်ပိုင်ထွန်း နှင့် မနန္ဒာမေ တို့ ၏ မင်္ဂလာဦးဆွမ်းကျွေး ဖိတ်ကြားလွှာ' တဲ့... အမလေး... အမြင်ကတ်ဖို့ ကောင်းလိုက်တာ... မုန်းဖို့ ကောင်းလိုက်တာ။ အမေတွေဝမ်းကကျွတ်ကတည်းက ကကြီးရေက စဆိုတဲ့အရွယ်ကနေ တက္ကသိုလ်က အမြီးလှလှ ဘွဲ့ လေးတွေယူတဲ့အရွယ်အထိ လည်ပင်းဖက်ကြီးလာတဲ့သူအချင်းချင်း ငါ့ကျတော့ 'ဒေါ်သုသုသွေး' လို့ တပ်ပြီး သူ့ ကျတော့ 'မနန္ဒာမေ' ဆိုပါလား... ပြီးတော့ သူယူမဲ့ အသက်လေးဆယ်နားကပ်နေတဲ့ လူကြီးကျ 'မောင်ပိုင်ထွန်း' တဲ့။ မျက်စိဆံပင်မွေးစူးလိုက်တာ။ ဒီလိုမျိုး ငါ့ကို 'ဒေါ်' တတ်ခေါ်ရမယ့် အရွယ်ရောက်နေပြီမှန်းသိရင်လဲ ငါနဲ့ ရွယ်တူ အဲဒီအသက်ရောက်နေတဲ့ နင်လည်း လင်မယူဘဲနေပါတော့လားဟဲ့။ မျက်နှာချင်းဆိုင်ပြီး စိတ်ရှိလက်ရှိရန်တွေ့ ချင်လိုက်တာနော်။

ပြောသာပြောရ... စကြားကြားချင်းတုန်းကဆို ရန်တွေ့ နိုင်ဖို့ နေနေသာသာ ကိုယ့်နားကိုယ်မယုံနိုင်လောက်အောင် ပါးစပ်အဟောင်းသားနဲ့  တော်တော်ကြီးကို shock ရသွားခဲ့တာ။ ကိုယ့်ကိုများ နောက်သလား ထင်လိုက်မိသေးပေမယ့် ကိုယ့်ရှေ့ တည့်တည့်မှာ သူငယ်ချင်းအရင်း ခေါက်ခေါက်ကြီးတစ်ယောက်လုံးရဲ့  တစ်သက်နဲ့ တစ်ကိုယ် တစ်ခါမှ မမြင်ခဲ့ဖူးတဲ့ ရှက်သလိုကြောက်သလို မျက်နှာနီမြန်းမြန်းကြီးက အခြေအနေတွေအားလုံးကို ဖော်ပြနေတာပဲလေ။ ဒီအသက်အရွယ်ထိ မိဘတွေကိုရော ချဉ်းကပ်လာသူတွေကိုပါ ခေါင်းချည်းတွင်တွင် ခါလာတဲ့သူက ဒီတစ်ခါတော့ မိဘတွေကိုများမငြင်းဆန်နိုင်တော့လို့ များလားဆိုပြီး မေးကြည့်တော့ ဒင်းက လူကိုတောင် ရဲရဲမကြည့်နိုင်ဘဲ "ငါ့ဆန္ဒအရပဲ လက်ခံလိုက်တာပါ မိသုရယ်" တဲ့။ ခါတိုင်းများ စကားပြောစရာရှိ ကိုယ့်လိုပဲ ဟောဟောဒိုင်းဒိုင်း ပွင့်ပွင့်လင်းလင်း (တူမတွေအခေါ်အရ 'အာဗြဲလျှာဗြဲ') ပြောတတ်တဲ့သူက ခုများတော့ မပွင့်တပွင့် အောက်ကလိအာသံနဲ့  ဖြစ်နေလိုက်တာ။ ယောကျာ်းတွေကိုအထင်မကြီးလို့  ယောကျာ်းလုံးဝမယူဘူး၊ တသက်လုံး အပျိုကြီးအဖြစ်နဲ့ ပဲ နေသွားကြမယ်လို့  ကြွေးကြော်ခဲ့သူက ခုတော့လဲ ၀တ္ထုတွေထဲကလို အချစ်ကြောင့် အရာအားလုံးပြောင်းလဲသွားပြီပေါ့။ နေနှင့်ဦး... ဒင်းကတောင် ဖိတ်နိုင်သေးတာ... ငါကရော ဘာလို့ မသွားနိုင်ရမှာလဲ။ အလှဆုံးဝတ်ပြီးကို မင်္ဂလာပွဲကို ကြော့ကြော့လေး တက်လိုက်ဦးမယ်။

"တီသု... အန်တီနန္ဒာက သမီးကိုလဲ လိုက်ခဲ့လို့ သေချာမှာသွားတယ်... အဲဒါ အင်္ကျီလိုက်ဝယ်ပေးဦး..."

အဲ... ဟုတ်သားပဲ... မီးလုံးပြောမှ သတိရတယ်... မင်္ဂလာဆောင်ကို ဘယ်သူနဲ့ သွားရမှာတုန်း... ဖေဖေနဲ့ မေမေကလဲ မေမြို့ မှာ... မမတို့ ကလည်း သူတို့ မအားတိုင်း မီးလုံးကိုပဲ သူတို့ ကိုယ်စားဆိုပြီး ထည့်ပေးလိုက်မှာ... မီးလုံးကို ခေါ်သွားလို့ တော့ မဖြစ်ပါဘူး... အရင်တစ်ခါ အလှူတုန်းကလို အပျိုကြီးတို့  ပွဲတက်ဖော်မရှိလို့  တူမကို အားကိုးနေရတယ်လို့  အပြောခံနေရဦးမယ်။ ခါတိုင်း ပွဲတွေလမ်းတွေဆို ကိုယ်ရယ်၊ နန္ဒာရယ်၊ ဆုမွန်ရယ် အပျိုကြီးသုံးယောက်တူတူသွားနေကျဟာ... ခု အင်္ဂလန်မှာ မာစတာတက်နေတဲ့ ဆုမွန် ကျောင်းပိတ်ရက်ပြန်အလာကိုတောင် မစောင့်နိုင်တော့လောက်အောင် ဟိုမိန်းမက သစ္စာဖောက်တော့ ကိုယ့်မှာတစ်ယောက်ထဲငိုင်တိုင်တိုင်နဲ့ ... တခြားသူငယ်ချင်းတွေနဲ့ ချိန်းသွားရင်ရပေမယ့် သူတို့ က စုံတွဲတက်ကြမှာနဲ့  ကိုယ်ကဘေးမှာ တယောက်ထဲ ကြောင်တောင်တောင်ဖြစ်နေရမှာ...။
အို... ဘာဖြစ်လဲအေ... ဘယ်သူ့ ဂရုစိုက်နေရမှာမှတ်လို့ ... သတ္တိရှိလို့  အပျိုကြီးလုပ်နေတာ... တကိုယ်တည်းပဲကြဲတာပေါ့။ လောလောဆယ်တော့ တူမချောကို မလိုက်ခဲ့ဖို့  ချော့ပြောရဦးမယ်။

"သမီးကလဲ... လူကြီးပွဲကြီးကို... သမီးပျင်းနေမှာပေါ့... တီသုတောင် မတတ်သာလို့ သွားရမှာ... နေခဲ့လိုက်နော်... လိမ္မာတယ်... နောက်နေ့ ကျ တီသုနဲ့  ခြေသည်းသွားပြင်မယ်နော်... အပြန်ကျရင် ကြေးအိုးလည်း ၀င်စားမယ်နော်... ဟုတ်ပြီလား..."

တူမချောက ဒီလောက်နဲ့  ကျေနပ်သွားလို့  တော်ပါသေးရဲ့ ။ အင်း... မင်္ဂလာဆောင်အတွက်ဆို အ၀တ်အစား၊ အိတ်၊ ဖိနပ်၊ မိတ်ကပ်အတွက် ပိုက်ဆံကတော့ တော်တော်လေး ထွက်ဦးတော့မယ်။ အာ... ဘာဖြစ်လဲ... ကြိုက်သလောက်ကုန်စမ်း... မိနန္ဒာ မင်္ဂလာဆောင်မှာ အလှကြီးလှနေစေဖို့ က အရေးကြီးတယ်။ စိတ်ချ... ကျောင်းတုန်းက လူတိုင်း လည်ပြန်ငေးရတဲ့ 'သုသုသွေး' ဒီမင်္ဂလာဆောင်မှာလဲ အပျိုကြီးမမအနေနဲ့ အလှဆုံးဖြစ်စေ ရမယ်။

...................................................................

shopping mall တစ်ထပ်ပြီး တစ်ထပ်သာ ကုန်သွားတယ်... ခုချိန်ထိ စိတ်ထဲသဘောကျတဲ့ ဖိနပ်ရော အိတ်ရောတစ်ခုမှ မမြင်မသေးပါလား။ ဒါတောင် မနက် ၉နာရီကတည်းက ထွက်လာလိုက်တာ ခု shopping mall ပါနဲ့ ဆို လေးခုမြောက်ရှိပြီ။ ညနေ ၃နာရီထိုးခါနီးမို့ လို့  တကိုယ်လုံးလဲ နုံးချိနေပြီ။ မင်္ဂလာဆောင် မင်္ဂလာဆောင်... တော်တော်လေးကို ကရိကထများပါလားနော်။ မဟုတ်သေးပါဘူးလေ... ခါတိုင်း မင်္ဂလာဆောင်တွေအတွက်ဆို ဒီလောက်မဟုတ်ပါဘူး... ခုဟာက လုံးဝနောက်ကောက်ကျလို့ မဖြစ်တဲ့ ဒင်းရဲ့ မင်္ဂလာဆောင်မို့ လို့ ပေါ့။
ဟွန့် ... မင်္ဂလာဆောင်မယ့် ဒင်းကိုယ်တိုင်တော့ ဘယ်လိုနေမလဲမသိ... ကိုယ်ကတော့ ခေါင်းနောက်အောင် ပြင်ရ ဆင်ရ ဈေးဝယ်ထွက်ရနဲ့ ...။

မိတ်ကပ်ပြင်ဖို့ ကိစ္စ စုံစမ်းနေတာနဲ့ တင် အရင်တပတ်လုံးလဲ အချိန်ကိုကုန်ရော... ခါတိုင်းပွဲလမ်းတွေဆို ကိုယ်တိုင်ပြင်မိတ်ကပ်လောက်နဲ့ ပြီးပေမယ့် နန္ဒာ့ပွဲမှာတော့ တော်ရိလျော်ရိ မိတ်ကပ်လောက်နဲ့  ဘယ်ဖြစ်ပါ့မလဲနော်။ အသိတွေဆီလိုက်စုံစမ်းကြည့်၊ မိတ်ကပ်ဆရာတွေ ပင်တိုင်ပြင်ပေးတဲ့ မော်ဒယ်တွေရဲ့ ဓာတ်ပုံတွေကိုယှဉ်ကြည့်နဲ့ ... မရွေးတတ်တော့တဲ့အဆုံး ရုံးက ညီမတယောက် အကြံပေးလို့  အစမ်းသွားပြင်ကြည့်ခါမှ ငါးပါးကိုမှောက်ရော... နာမည်ကြီး မိတ်ကပ်ဆရာနဲ့ ပြင်တာကိုပဲ ကိုယ့်အလှည့်ကျမှပဲ ကံဆိုးပြီး ပြင်တဲ့ပစ္စည်းတွေမသန့် လို့ လား၊ မပြင်ခင်နေ့ က မျက်နှာပေါင်းတင်ထားလို့ ပဲ အသားအရည်က over-sensitive ဖြစ်နေလို့ လားတော့ မသိ... အစမ်းပြင်ကြည့်တဲ့ညမှာပဲ တစ်ခါမှ ၀က်ခြံမပေါက်တတ်တဲ့မျက်နှာက အဖုသေးသေးလေးတွေ ထွက်လာလိုက်တာ... beauty saloon ဆီ နောက်တစ်ခေါက်ထပ်သွားပြီး မျက်နှာရော တကိုယ်လုံးပါ ထပ်ပြီးပေါင်းတင်လိုက်ရသေးတယ်။

မိတ်ကပ်ကိစ္စ အဆင်ပြေတော့လည်း ၀တ်မယ့်အ၀တ်အစားအတွက် weekend တစ်ခုလုံး ခေါင်းရှုပ်ရပြန်သေး...။ ၀တ်မဲ့ဝတ်စုံပုံစံကို ဒီဇိုင်နာ လုပ်နေတဲ့ဝမ်းကွဲအစ်မနဲ့  ခေါင်းချင်းရိုက်စဉ်းစားရတာ သူ့ အိမ်မှာ ညသန်းခေါင်သာရောက်ရော... အကြိုက်ကမတွေ့ နဲ့ ... ကိုယ်ကလည်း ဂျီး (ချေး) နည်းနည်းများတတ်တော့ (သူများတွေ အမနာပပြောကြတာတော့ 'ဇီဇာကြောင်တယ်' ဆိုလား) နောက်ဆုံးမှပဲ စိတ်ရှည်လွန်းတဲ့ အစ်မ၀မ်းကွဲကျေးဇူးနဲ့  ခဲရာခဲဆစ် စိတ်ကြိုက်ပုံတစ်ပုံထွက်တော့တယ်။ ဒါတောင် ခုချိန်ထိ ဘာအရောင်ချုပ်ရမယ်ဆိုတာ ဆုံးဖြတ်လို့ မရသေးဘူး။ ကိုယ့်အကြိုက်ဆုံး အပြာရောင်ဝတ်ချင်ပေမယ့် 'ငါ မင်္ဂလာဆောင်ရင် အပြာရောင်ထိုင်မသိမ်း ၀တ်မှာ' လို့  သူငယ်ချင်းတွေကြားထဲ ကြွေးကြော်ခဲ့ဖူးတော့ အပြာရောင်ဝတ်သွားရင် အကြောင်းသိတွေက အပျိုကြီးတယောက် ကိုယ်တိုင်မဆောင်နိုင်လို့  သူများပွဲမှာ ကိုယ်ဝတ်ချင်တာလေးတွေ ၀တ်ရရှာတယ်လို့  ပြောကြဦးမယ်။ ပန်းရောင်တို့  အနီရောင်တို့ ကျလဲ ကိုယ်က ဘယ်လိုမှမကြိုက်ပြန်နဲ့ ... တော်ပါပြီ... ဘာဖြစ်လဲ... ကိုယ်ကြိုက်တဲ့အရောင် ကိုယ်ဝတ်တာပဲ... လာပြောလို့ကတော့ ကိုယ့်မလဲ စကားမတတ်တဲ့ ငအူငအမ'မှ မဟုတ်တာ။ ဒီကအပြန် အပြာရောင်ပိုးချိတ်လေး သွားဝယ်တော့မယ်။ သြော်...အရေးထဲမှ လမ်းမလျှောက်ချင်လောက်အောင် ညောင်းပါတယ်ဆို ဖုန်းက လာပြန်ပြီ။

"မမ လား... သမီး ၀တ်ရည်ပါ... မမ ဆိုင်ခွဲအသစ်အတွက် နေရာကြည့်ဖို့  ပွဲစား ကိုသူရနဲ့  ဒီနေ့ ၃နာရီခွဲတွေ့ ဖို့  ချိန်းထားတာ remind လှမ်းလုပ်တာပါ..."

အား... ဒုက္ခပါပဲ... လုပ်စရာတွေကလဲ များလိုက်တာနော်။ ဖိနပ်နဲ့  အိတ်ကလည်း မရသေးဘူး။ ပိတ်စလဲ သွားဝယ်ရဦးမယ်။ ဒါတွေအကုန် တနင်္ဂနွေနေ့ မီဖို့ က အရေးကြီးတယ်။ ကျန်တဲ့ကိစ္စတွေတော့ နောက်မှပဲ...

"၀တ်ရည်ရေ... ကိုသူရကို ပြောလိုက်ပါနော်... မမ လုပ်စရာလေးတွေများနေလို့ ... ဒီနေ့  မတွေ့ နိုင်ဘူးလို့ ... မမလည်း သူ့ ဆီဖုန်းဆက်ပြီး ကိုယ်တိုင် တောင်းပန်ပါဦးမယ်... ပြီးတော့ ဒီသောကြာနေ့ အထိ မမ ရုံးကို အချိန်ပိုင်းပဲလာနိုင်မယ်... အဲဒါ ၀တ်ရည်ပဲ အားလုံးကြည့်လုပ်ပေးထားပါနော်... ဒါပဲနော်..."

ပြောပြီးပြီးချင်း ဖုန်းချမှ... မဟုတ်ရင် မေးခွန်းတွေနဲ့ စကားရှည်နေဦးမယ်။ ခါတိုင်းများ ရုံးနဲ့ ဆိုင်ကို အချိန်ပြည့် ပျက်ရက်မရှိသွားပြီး စီးပွားရေး သောင်းကျန်းလွန်းတဲ့ကိုယ့်ကို ဒီ၂ပါတ်လောက်အတွင်း ခြေလှမ်းတွေ ပျက်နေတာနဲ့  အားလုံးသတိထားမိနေကြပြီ။ ခါတိုင်း အလုပ်လောဘကြီး လွန်းတဲ့ သူတို့ မမ ခုတလောမှ မင်္ဂလာဆောင်လေးတစ်ခုအတွက်နဲ့  ရှိသမျှအလုပ်တွေကို လှည့်မကြည့်နိုင်သလောက်ဖြစ်နေတာကိုလည်း နားမလည်နိုင်လောက်အောင် ဖြစ်နေကြပုံပဲ။ တတ်နိုင်ဘူးကွယ်... ကိုယ့်ရဲ့  စာအုပ်တိုက်တွေက ကိုယ်၂ပါတ်လောက်ပျက်ကွက်လဲ ကိုယ့်ရဲ့ ဂုဏ်သိက္ခာကို မထိခိုက်ပါဘူး။ သူငယ်ချင်းအသိုင်းအ၀ိုင်းတွေအားလုံး စောင့်ကြည့်အကဲခတ်နေကြတဲ့ တက္ကသိုလ်ကတည်းကနေ မနေ့ တစ်နေ့ အထိ ယောကျာ်းတွေနဲ့ မပတ်သက်ဘဲ မာနတွေတလူလူလွင့်ခဲ့တဲ့ အပျိုကြီးသုံးယောက်ထဲကမှ ဗွေစော်ဦးတယောက်ရဲ့ မင်္ဂလာပွဲကို ကိုယ်က ဖြစ်ကတတ်စမ်း ကဗျစ်ကညစ်ပုံစံနဲ့ သွားမှ 'သုသုသွေး' ရဲ့  ဂုဏ်သိက္ခာတွေ မြောင်းထဲရောက်ကုန်မှာလေကွယ်။ ဆုမွန်ရေ... နင်ကတော့ အဝေးမှာဆိုတော့ နေသာပေမယ့် ငါကတော့ အပျိုကြီးဂုဏ်သိက္ခာကိုထိန်းဖို့  ကြိုးပမ်းနေရပြီ။ တော်ပြီ တော်ပြီ... အချိန်မဆွဲဘဲ မြန်မြန်ဝယ်မှ... ဒီနေ့ တောင် အင်္ဂါနေ့ ရောက်နေပြီ... အင်္ကျီချုပ်ရ၊ fitting ပြန်ချရမှာတွေအတွက် အချိန်ပေးရဦးမှာ။ နေပါဦး... ဒီနေ့ မှ အင်္ဂါနေ့ နော်... ဟား... သွားပါပြီ... မနေ့ ညက တနင်္လာနေ့ ကို အင်္ဂါဂြိုဟ်သက်နဲ့  ပုတီးတွေစိပ်မိပြီ... မိသု မိသု... နင့်စိတ်တွေ ဘယ်ရောက်နေလဲနော်။
.............................................................

အပြာရင့်ရောင်ပြောင်ပြောင် လေးလက်မ pencil heel လေး ကြမ်းပြင်ပေါ် သုံးလေးလှမ်းလောက် လှမ်းလိုက်ရင်ပဲ အ၀င်ဝ ဧည့်ကြိုနေရာနားမှာ ရုံးစုရုံးစုဖြစ်နေတဲ့သူတွေအားလုံး ကိုယ့်ဘက်ကို မသိမသာရော သိသိသာသာပါ လှည့်ကြည့်လာကြပြီ။ ကြည့်ကြစမ်း... အဲဒါ 'အပျိုကြီး' လို့  ရှင်တို့  ရှုံ့ ချနေကျ အသက် ၃၅နှစ်တင်းတင်းရှိပြီဖြစ်တဲ့ မိန်းမ။ အဲဒါ 'မာနခဲ' လို့  ရှင်တို့  မေးငေါ့နေကျ ဘယ်ယောက်ျားကိုမှ အထင်မကြီးတဲ့ မိန်းမ။ အဲဒါ 'သူများတကာ မင်္ဂလာဆောင်တာကို အားကျနေမလားလို့ ' ရှင်တို့  စောင့်ကြည့်ဝေဖန်နေကျ တစ်ကိုယ်တည်း နေနေတဲ့ မိန်းမလေ။ မိုးပြာရောင်စီးကွင့်လေးတွေကျဲကျဲထိုးထားတဲ့ ငွေရောင်ပိုး အင်္ကျီပုံ ဆန်းဆန်းလေးနဲ့  မိုးပြာရောင်နဲ့ ငွေရောင်စပ်ထားတဲ့ ပိုးချိတ်လုံချည်လေးက gym မှန်မှန်သွား၊ အစားအသောက်ထိန်းထားလို့  ကျောင်းတုန်းကထက် မဆိုသလောက်လေးပဲပြည့်လာတဲ့ ခန္ဓာကိုယ်အချိုးအစားမှာ ချပ်ချပ်ရပ်ရပ်လေး...။ အောက်ပိုင်းနားလေးတွေကောက်ထားတဲ့ ဆံပင်ကတော့ ဒီနေ့ မှ setting ထပ်လိပ်ထားလို့  ခြုံထားတဲ့ မိုးပြာရောင်ပိုးပ၀ါလေးပေါ်မှာ ခွေနွယ်နွယ်လေးကျလို့ ။ မိတ်ကပ်ပြေပြေလေးလိမ်းထားတဲ့မျက်နှာကလည်း age defence cream တွေ anti-wrinkle gel တွေ မှန်မှန်လိမ်းတဲ့ကျေးဇူးနဲ့  လွန်ခဲ့တဲ့ ၁၅နှစ်လောက်တုန်းက တက္ကသိုလ်မှာ နာမည်ကြီးခဲ့တဲ့အလှထက် တစ်ပြားသားမှ မလျော့သေး။ အတင်းပြောချင်ကြတဲ့ မျက်လုံးတွေရှေ့ မှာဆို ချီနေတတ်တဲ့မျက်နှာပေးကတော့ ဘယ်တော့မှ မပြောင်းလဲတဲ့ 'သုသုသွေး' ရဲ့  trademark ပေါ့ကွယ်။ ကဲ... ပြောကြစမ်းပါဦး... သူများတကာတွေ မင်္ဂလာဆောင်လို့  အားကျပြီး ကိုယ့်ဘ၀ကိုယ် ၀မ်းနည်းကျိတ်ဆွေးနေမယ့် ခပ်ညံ့ညံ့အပျိုကြီးတွေထဲမှာ 'သုသုသွေး' တယောက်ပါရဲ့ လားလို့။ မျက်လုံးပေါင်းများစွာရှေ့ ကနေ ကြော့ကြော့လေးဖြတ်လျှောက်ပြီး သတို့ သမီးအလှပြင်ခန်းထဲဝင်သွားတော့ အင်္ကျီလဲရင်းတန်းလန်း နန္ဒာက ကိုယ့်ကိုတွေ့ တွေ့ ချင်း ၀မ်းသာအားရနှင့် ထအော်သည်။

"လှလိုက်တာ မိသုရယ်... နင်တကယ်လာတယ်နော်... ငါ့မှာ နင်မလာလောက်ဘူးထင်လို့  ၀မ်းနည်းနေတာ... ငါ့ကို စိတ်မဆိုးဘူးပေါ့နော်..."

ပြောလဲပြော မျက်ရည်တွေလဲတကယ်ဝဲလာတဲ့ နန္ဒာ့ကိုကြည့်ရင်း ကိုယ်ပါဝမ်းနည်းလာပေမယ့် ပါးစပ်ကတော့ 'သစ္စာဖောက်မ' လို့ ရွတ်ရင်း မျက်စောင်းရွယ်လိုက်မိသည်။ ဘယ်လောက်ကြီးပဲ စိတ်ဆိုးဆိုး... ကိုယ်နဲ့ ဒီလောက်တောင် ညီအမတွေလိုချစ်ကြတဲ့ သူငယ်ချင်းရဲ့ မင်္ဂလာဆောင်ကို မလာနိုင်လောက်အောင်တော့ ဘယ်လိုမှ အသည်းမမာနိုင်တာ ကိုယ့်ကိုယ်ကို အသိဆုံးပါ။ ကိုယ့်မှာ ဒီအသက်အရွယ်ရောက်တဲ့အထိ သံယောဇဉ်တွယ်စရာဆိုလို့  ဖေဖေ၊ မေမေ၊ မမ၊ အချစ်တော်လေး ကီကီ နဲ့  တူမလေး အပြင် ဒီဘ၀တူ သူငယ်ချင်းလေးတွေပဲ ရှိတဲ့ဟာကို...။ ဒီမင်္ဂလာဆောင်ကို လှလှလေးဝတ်ပြီးတက်ပြချင်တဲ့ အပျိုကြီးမာနအပြင် ကိုယ့်သူငယ်ချင်းအရင်းခေါက်ခေါက်ရဲ့  မင်္ဂလာပွဲကိုလာချင်တဲ့ စိတ်ရင်းလေးလည်း ပါပါတယ်လေ။

နန္ဒာနဲ့ စကားပြောအပြီး ခမ်းမထဲဝင်လာတော့ ဘယ်မှာ ထိုင်ရမှန်း မသိဖြစ်နေတုန်း နန္ဒာ့မေမေ အန်တီဝေ လိုက်ပို့ ပေးတဲ့ဝိုင်းအရောက် ထိုင်နှင့်နေတဲ့သူကိုမြင်မြင်ချင်း စိတ်အပျက်ကြီးပျက်သွားမိသည်။ ရှယ်လီမြင့် ပါလား... သေပါပြီ... မတွေ့ ချင်ဆုံးလူနဲ့ မှ တည့်တည့်တိုးရတယ်လို့ နော်... လင်တစ်ယောက်ရထားတာကိုပဲ တခြားဘယ်သူမှမရနိုင်တဲ့ ဘုရားပေးတဲ့ဆုထူးကြီးကို သူတစ်ယောက်တည်း အပိုင်ရထားသလို လူတကာကို သူ့ လင်တော်ကြောင်းကောင်းကြောင်း 'သူ့ လင်သူတော်ကောင်းတရား' တရစပ်ပြောတတ်တဲ့ မိန်းမ။ ပြီးရင် တစ်ကိုယ်တည်းအေးအေးနေတဲ့ ကိုယ်တွေလို အပျိုကြီးတွေကိုလည်း ကိုယ့်ထမင်းကိုယ်စားပြီး မျက်စိဒေါက်ထောက်ကြည့် အတင်းက တုတ်ဦးမယ်။ အခုလဲ ကြည့်ပါလား... ရောက်ရောက်ချင်း ဆောက်နဲ့ ထွင်းပြန်ပြီ။

"မိသု ပါလား... ကြည့်စမ်း... ၀လာလိုက်တာနော်... မနည်းကြီး ရုပ်ဖမ်းရတယ်... အပြာရောင်လေး ၀တ်လာတယ်နော်... ဟင်းဟင်း..."

"ဟုတ်ပါ့ ရှယ်လီရယ်... အသက်တွေကြီးလာပြီဆိုတော့လေ... ရှယ်လီတို့ လို ကလေးမွေးထားတဲ့သူတွေလောက် ပုံမပျက်ရုံတမယ်ပဲ... အပျိုကြီးတွေလဲ ၀ိတ်တက်တာပါပဲနော်... ဟင်းဟင်း..."

ကဲ... ခံလေ... လူကို ရိတိတိလာလုပ်ချင်ဦး... ကျောင်းတုန်းကထက် ၅ပေါင်တိတိပဲပိုလာတဲ့ ခန္ဓာကိုယ်ကိုများ ၀လာသလေးဘာလေးနဲ့ ... သေလိုက်လေ... နင့်ကိုယ်နင် မှန်ထဲပြန်ကြည့်ဦးဟဲ့... တကတည်းနော်... ကိုယ့်ဟာကိုယ်နေတာကိုပဲ... ဘာတွေများ မနာလိုဝန်တိုဖြစ်နေကြတယ်မသိ...။

"ဟဲ့... နန္ဒာတော့ စွံသွားပြီနော်... ဘယ်လိုလဲ... နင်ရော အားမကျဘူးလား... အပျိုကြီးဆိုတာ အပူမရှိတာတော့မှန်တယ်... ဒါပေမယ့် စိတ်ကြည်နူးစရာလဲ မရှိဘူးဟဲ့... ငါ့ဆို ငါ့ဘေးမှာ ကိုကိုအမြဲရှိတော့ အရမ်းစိတ်ချမ်းသာရတာ..."

လာပြီ လာပြီ... စလာပြီ... တနည်းနဲ့ မရတော့ တခြားနည်းလမ်းနဲ့  နှိပ်ကွပ်တော့မယ်... လျှာသွေးထားပေတော့ မိသုရေ...

"ရှယ်လီရယ်... နင့်သမီးအတွက်ပဲ နင်ပူစမ်းပါ... အားကိုးရမယ့်သူရှိမှ စိတ်ချမ်းသာရမဲ့အထဲ ငါတို့ ကမပါဘူး..."

"နင်ကတော့နော်... ကျောင်းတုန်းက အပြောလေးတွေ ခုထိမလျှော့သေးဘူး... ဟို နင့်ကို ကျောင်းတုန်းက အသေအလဲကြိုက်တဲ့ မျိုးမောင်မောင် ဆိုလည်း မဆိုးပါဘူးဟဲ့... ဟို ရှေ့ ဝိုင်းမှာ တွေ့ လား... နင်ဝင်လာကတည်းက လိုက်ကြည့်နေတာ... နင်ကသာ သတိမထားမိလို့ ..."

"အမလေး... ကျောင်းတုန်းက ဒီလောက်ရုပ်ဆိုးတဲ့ မည်းသည်းသည်း လုံးတုံးတုံးကိုများ... ပြီးတော့ အဲအရွယ်ကတည်းက ပွဲစားယောင်ယောင် ဘာယောင်ယောင်နဲ့ ... အာကလဲကျယ်သေး..."

"နင်ကလဲ... သူက ခုအရမ်းကို စီးပွားအရှာကောင်းတာနော်... ခုထိ လူပျိုကြီးဟဲ့... သူ့ ကိုလိုချင်တဲ့ သမီးရှင်တွေဆို ၀ိုင်းဝိုင်းလည်လို့ ... သူကတော့ ခုချိန်ထိ သူ့ ငယ်ချစ်ကို မမေ့နိုင်ဘူးဆိုလား... ပြောသံကြားတာပဲ... နင့်ကို ပြောချင်တာ ဖြစ်မယ်... ခုနကတောင် နောက်လကျရင်လုပ်မယ့် ဆရာကန်တော့ပွဲအတွက် အလှူငွေ ဘယ်သူလက်ခံနေလဲ ငါ့ကိုလာမေးလို့  သုသုသွေး ဆီကို ပေးလိုက်လို့  ငါပြောလိုက်တယ်... နင့်ကိုစကားလာပြောရင် နင်အကဲခတ် ကြည့်လိုက်နော်..."

"အောင်မယ်... သေလိုက်ပါလား... ဘာ ငယ်ချစ် လဲ... နားခါးလိုက်တာ... မသိရင်ပဲ ငါကပဲ သူ့ ငယ်ရည်းစားလိုလိုနဲ့ ... ဒီမှာ ရှယ်လီ... သူ့ ဟာသူ ဘာကြီးပဲဖြစ်နေနေ... လုံးဝစိတ်မ၀င်စားဘူး... အကဲခတ်စရာလဲ မလိုဘူး... သူတင်မကလို့ ... တခြားဘယ်သူဖြစ်ဖြစ် တစ်စက်ကလေးမှ စိတ်မ၀င်စားဘူး... ရှင်းတယ်နော်..."

"အဲဒါပဲ... နင်က ကိုယ့်စိတ်ကိုယ် တံခါးပိတ်ထားတာကိုး... ဒီမှာ... နင်က လူတစ်ယောက် ကိုယ့်ကိုချဉ်းကပ်တိုင်း ဇွတ်ငြင်းလိုက်မယ်ချည်းပဲ တွေးနေတာ... ဒီလူနဲ့ ကိုယ်နဲ့  သဟဇာတဖြစ်မလား သဘောထားချင်းညီမလားဆိုပြီး မချင့်ချိန်ဘူး... ခု နန္ဒာ့ကိုဆို ကြည့်စမ်း... ဒီအသက်အရွယ်ရောက်မှ သူနဲ့ အဆင်ပြေမယ့်သူတွေ့ လို့  ရွေးချယ်လိုက်တာ... နင်လဲ အဲလိုချင့်ချိန်သင့်ပြီနော် မိသု... အားနေ အပျက်ဘက်ကချည်းတွေးပြီး ကိုယ့်စိတ်ကိုယ် တံခါးပိတ်ထားမနေနဲ့ ..."

"တော်စမ်းပါဟာ... မိသုတို့ က တစ်ယောက်တည်း နေနိုင်တယ်... ဘယ်သူမှ မလိုဘူး..."

စကားအတင်မခံချင်လို့  ပြောလိုက်ရပေမယ့် ရှယ်လီ့ နောက်ဆုံးစကားက ကိုယ့်ကို ငိုင်ကျသွားစေတာတော့အမှန်ပဲ။ သူပြောသလိုများ တကယ်ဖြစ်နေပြီလား... ဟုတ်တော့လဲ ဟုတ်သလိုပဲ... ကိုယ်ကလဲ ကျောင်းတုန်းကတည်းက ခုချိန်ထိ ကိုယ့်ကိုချဉ်းကပ်လာတဲ့သူတွေကိုဆို တချက်လေးတောင် မစဉ်းစားဘဲ 'ဘူး' ခံငြင်းခဲ့တာချည်းပဲလေ။ ရှယ်လီပြောသလို ကိုယ်နဲ့ အဆင်ပြေမပြေကို တစ်ခါမှ လေ့လာအကဲမခတ်ဖူးခဲ့တာ။ လေ့လာအကဲခတ်သင့်မှန်းလည်း စိတ်ကူးတောင် မကြည့်ခဲ့မိတာ။ ခုပြန်စဉ်းစားကြည့်တော့မှ နန္ဒာတို့  ဆုမွန်တို့ ကမှ ကျောင်းတုန်းက ရည်းစားမကျတကျ သံယောဇဉ်လေးတွေ ဖုန်းထဲကတဆင့် ရှိခဲ့ဖူးသေးတယ်... နောက်ပိုင်းမှ အဆင်မပြေလို့  ရည်းစားအဆင့်ကိုမရောက်လိုက်ဘဲ ဇာတ်လမ်းတွေပြီးကုန်ကြတာ။ ရှယ်လီပြောသလိုဆို သူတို့ ကမှ ကိုယ့်လိုမျိုး ဘယ်သူလာလာ ဇွတ်မှိတ်မငြင်းဘဲ စဉ်းစားချင့်ချိန်ခဲ့သေးတယ်ပေါ့နော်။ ကိုယ့်မှာသာ ဘယ်သူလာပြောပြော ငြင်းလွှတ်မယ်ဆိုတဲ့ အစွဲကြီး ၀င်နေတာထင်ပါရဲ့ ။ အစပိုင်းလာပြောကြတဲ့သူတွေကို သဘောမကျတာနဲ့ ပဲ နောက်ပိုင်း လာပြောသမျှလူတွေအားလုံးကိုလဲ အကဲတောင်မခတ်ကြည့်တော့ဘဲ အပြတ်ငြင်းပစ်တဲ့ အကျင့်ကြီးရသွားတယ် ထင်တယ်။ ဒီလိုဆို ကိုယ်က သူပြောသလို ကိုယ့်စိတ်ကိုယ် တံခါးပိတ်ပြီး ဘယ်သူမှ ၀င်မလာအောင် ကိုယ့်ကိုယ်ကို တားဆီးနေခဲ့တာပေါ့။ ဒါဆို ဒါဆို... ငါ အပျိုကြီးဖြစ်နေတာ ကိုယ့်ခံစားချက်ကိုယ် သုံသပ်ကြည့်ဖို့ မေ့လျော့နေခဲ့လို့ ပေါ့နော်။ ဘုရားရေ... ဒါဆို ငါက နှစ်ပေါင်းများစွာ ကိုယ့်စိတ်ကိုယ် အကျဉ်းချထားတဲ့သူ ဖြစ်နေပါပေါ့လား။
.........................................................

တီ တီ တီ တီ တီတီ

နောက်ဖက်ကကားဆီမှ ကျယ်ကျယ်လောင်လောင်ဟွန်းသံကြားမှ သတိဝင်လာပြီး လီဗာကိုဆောင့်နင်းကာ မီးပွိုင့်မှ ထွက်လိုက်မိသည်။ အတွေးတွေနဲ့ ချာချာလည်ပြီး စိတ်နဲ့ လူနဲ့ မကပ် ဖြစ်သွားလိုက်ပုံများ... မင်္ဂလာပွဲ ဘယ်အချိန်ပြီးသွားလို့  ဘယ်သူတွေကိုနှုတ်ဆက်ခဲ့ပြီး ဘယ်လိုကားပြန်မောင်းခဲ့သလဲတောင် မမှတ်မိချင်။ ရှယ်လီနဲ့ စကားပြောအပြီး ထောပတ်ထမင်းကို တို့ ကနန်းဆိတ်ကနန်းစားတာ၊ ပြန်ခါနီး မျိုးမောင်မောင်က ဆရာကန်တော့ပွဲအတွက်အလှူငွေနဲ့  သူ့  visiting card လာပေးရင်း သံယောဇဉ်မပြတ်တဲ့ အကြည့်တွေနဲ့ ကြည့်သွားတာ၊ ရှယ်လီက 'သေချာ အကဲခတ်ကြည့်လိုက်နော်'လို့  ပြုံးစိစိလာပြောသွားတာလောက်ပဲ ရေးတေးတေးမှတ်မိတော့သည်။ ခေါင်းထဲမှာ 'ကိုယ့်စိတ်ကိုယ် တံခါးပိတ်ထားတာ' ဆိုတဲ့ စကားပဲ ပဲ့တင်ထပ်နေကာ ကားကိုတောင် ဦးတည်ရာမရှိဘဲ မောင်းလာနေမိတာ ခုနကအထိပဲ။ တော်သေးတာပေါ့... accident တွေ ဘာတွေမဖြစ်လို့ ။ ဒီပုံနဲ့  ကားဆက်မောင်းနေလို့ တော့ မဖြစ်သေးပါဘူး... အာရုံပြောင်းသွားအောင် ရှေ့ က city mart ထဲ ၀င်လိုက်မှပဲ။

city mart ထဲဝင်သွားတော့ အပြာရောင်ဝတ်စုံနဲ့  အလှကြီးလှနေတဲ့ ကိုယ့်ကို လူတွေက ကွက်ကြည့်ကြည့်နဲ့ ... အင်းနော်... ရှယ်လီပြောတာတော့ မှန်နေပါပြီ... ဒီအရွယ်ရောက်တဲ့အထိတောင် ဒီလောက်လှသေးတဲ့ငါ ခုချိန်ထိ တစ်ယောက်မှမတွေ့ သေးတာ ကိုယ့်စိတ်ကိုယ် တံခါးပိတ်ထားမိလို့ ပဲ။ ဒါဆို ငါက တစ်သက်လုံး ဒီအတိုင်းပဲ နေသွားရတော့မှာလား... ကိုယ့်အနားကလူတွေကို ပြန်ပြီးအကဲခတ်ကြည့်ရမှာလား။ စဉ်းစားရင်းနဲ့  မျိုးမောင်မောင် မျက်နှာကြီးက မဆီမဆိုင် ပေါ်လာပြန်ပြီ... ဘာဆိုင်လို့ တုန်း... ဒီလောက် ရုပ်ဆိုးဆိုး ဗိုက်ပူပူကြီးကိုများ... ။

cosmetic တန်းဘက်ရောက်တော့ အိမ်မှာ anti-wrinkle gel ကုန်တာ သတိရတာနဲ့  တစ်ဗူးလှမ်းယူလိုက်မိသည်။ ထုံးစံအတိုင်း sales girl လေးက အသက်၃၀ကျော်ရင် အသားအရေတွေ ဘယ်လို ပျက်စီးတတ် ကြောင်း၊ အရေးအကြောင်းတွေ ဘယ်လိုပေါ်တတ်ကြောင်းကို အားပါးတရ ပြောနေတာကို နားထောင်နေပေမယ့် နားထဲမှာတော့ အသံတွေက ဝေးသွားလိုက် နီးသွားလိုက်နဲ့ ။ အသက်တွေလဲကြီးလာပြီပဲနော်... အပေါ်ယံအလှတွေ ဘာအရေးကြီးတော့မှာလဲ။ အဓိကက စိတ်ထားကောင်း ဖို့ ပါပဲလေ... အင်း... ဒီလိုဆိုတော့လဲ မည်းသည်းသည်း ရုပ်ဆိုးဆိုး မျိုးမောင်မောင် မျက်နှာက အာရုံထဲမှာ အနည်းငယ်ပြေလာသလိုပဲ။အာ... ငါဘာတွေ စဉ်းစားနေမိပါလိမ့်... ရှေ့ မှာ အဆီကျ လက်ဖက်ခြောက်ထုပ်ပါလား။ ဒီလတော့ မင်္ဂလာဆောင်အတွက်နဲ့  gym ကို ၂ပါတ်လောက်တောင်ပျက်ထားတာ... တစ်ထုပ်လောက် ၀ယ်သွားဦးမှ... ကိုယ်တွေလဲ ၀ိတ်တွေတော်တော်လေး သတိထားထိန်းရတဲ့အရွယ်ရောက်လာပြီ... မိန်းကလေးတွေတောင် ဒီလောက်ထိန်းရခက်တာ... ဘီယာတွေဘာတွေသောက်တတ်တဲ့ ယောကျာ်းလေးတွေဆို ပိုဆိုးမှာပဲနော်... အင်း... မျိုးမောင်မောင်ရဲ့  ဘီယာဗိုက်ကြီးကို အဆီကျ လက်ဖက်ခြောက်ထုပ်က before နဲ့  after ပုံလိုမြင်ယောင်ကြည့်တော့လဲ သူ့ ပုံစံက သိပ်မဆိုးလှပါဘူး... အာ... တော်စမ်းပါ... သုသုသွေး... နင့်စိတ်တွေ ဘာဖြစ်နေရတာတုန်း...။

တောက်... အရေးထဲမှ ရှေ့ က အတွဲကလည်း အဖြစ်တွေသည်းနေလိုက်တာ... ကောင်မလေးက သူ့ ကိုယ်သူ 'မီး မီး' နဲ့  ပကျိပကျိ ချွဲနေလိုက်ပုံများ... ပက်ကျိမ ကျနေတာပဲ... အမလေး... ဘာမဟုတ်တဲ့ စကားကိုများ ရယ်နေလိုက်တာ... လုပ်ရယ်သံကြီးနဲ့ ... နားကလောချင်စရာ... စာအုပ်ရှာနေရတာတောင် အာရုံနောက်တယ်။ မဂ္ဂဇင်းတွေကလည်း ဒီနေ့ မှ ကိုင်လိုင်တိုင်း မျက်နှာဖုံးတိုင်းမှာ မော်ဒယ်တွေရဲ့  သတို့ သမီး သတို့ သားဝတ်စုံတွေနဲ့  မင်္ဂလာဆောင်ပုံ ဓာတ်ပုံတွေချည်းပဲ... သီတင်းတောင်ကျွတ်မယ် မကြံသေးဘူး... အမြင်ကတ်စရာနော်... အမယ်... ဒီ သတို့ သမီးထိုင်မသိမ်းလေးက အပြာရောင်လေးပါလား... ငါဝတ်ချင်တဲ့ ပုံစံလေးပေါ့... ဘေးက သတို့ သားနေရာမှာ ဟို မျိုးမောင်မောင် ရုပ်က ၀င်လာပြန်ပြီ... ကဲ သုသုသွေးရေ... နင် ဘယ်လိုဖြစ်နေလဲ... နင်တစ်သက်လုံး အရိပ်တကြည့်ကြည့်နဲ့  ထိန်းလာခဲ့တဲ့ အပျိုကြီးသိက္ခာကိုမှ မထောက်... ရှက်ဖို့ ကောင်းလိုက်တာ။

"ဟင်... ဦးကလဲ... မရဘူးကွာ... ၀ယ်ပေးရမှာဘဲ... နော်ဆို... နော်နော်..."

ကိုယ့်ကိုယ်ကို ဒေါသတကြီး ကျိန်ဆဲပြီးလှည့်အထွက် ဘေးက ပက်ကျိမက နှုတ်ခမ်းကိုဆူ၊ ခြေကိုဆောင့်ပြီး အချွဲလွန်သွားကာ သူ့ ရဲ့ ဒေါက်ချွန်ကြီးနဲ့  ကိုယ့်ခြေထောက်ကို တည့်တည့်ကြီးကို နင်းချလိုက်တော့ အစကတည်းက ထွက်ပြီးသားဒေါသက ခြေထောက်နာတာနှင့်ပေါင်းပြီး ငယ်ထိပ်ကို ရောက်သွားတော့သည်။

"အား... ဟဲ့... ဘယ်လိုဖြစ်နေတာတုန်း... ဘယ်လောက်တောင် ထွန့် ထွန့် လူးနေလို့  လူတယောက်လုံးကိုတောင် မမြင်ရတာလဲ..."

ပြောပြောဆိုဆို မျက်နှာချင်းဆိုင် ရန်တွေ့ မယ်အလုပ်... ဟင်... အဲဒါ အဲဒါ... ပက်ကျိမ လက်မောင်းကြီးချိတ်ပြီး ချွဲပစ်နေတာကို မိန့် မိန့် ကြီးပြုံးပြီး သဘောတွေကျနေတာ ဟိုသကောင့်သား မျိုးမောင်မောင် မဟုတ်လား။ အမလေး... ပက်ကျိမရဲ့  ဦး ဆိုတာ ဒင်းကိုး... ရှယ်လီမြင့်ရေ... နင်ပြောတဲ့ လူပျိုကြီးကို လာကြည့်ဦးဟဲ့... သူ့ သမီးလောက်ရှိတဲ့ကောင်မလေးနဲ့  သူ့ မျက်နှာ အဆီတ၀င်းဝင်း ဖောင်းအစ်အစ်ကြီးကို ဖြီးနေလိုက်ပုံများ... မသတီချင်စရာ...။ ခုမှ လူကိုတွေ့ ပြီး မျက်လုံးတွေပြူးပြီး မျက်နှာတွေအကြီးအကျယ်ပျက်လို့ ... ခုနက မင်္ဂလာဆောင်မှာ သံယောဇဉ်မပြတ်တဲ့မျက်လုံးတွေနဲ့ ကြွေပြခဲ့လို့  သုသုသွေး တယောက် ရင်တွေခုန်နေပြီလို့  အပိုင်တွက်ထား တယ်ပေါ့ လေ... ရင်တွေခုန်ထားရပြီးမှ နင့်သရုပ်မှန်ကိုတွေ့ ရလို့  ဒေါသတွေထွက်ပြီး နင်ပဲငဆ ရန်တွေ့ တော့မယ်များ ထင်နေသလား... ဆောရီးပဲ မျိုးမောင်မောင်ရေ... အဲလို ခပ်တုံးတုံးမိန်းမတွေရဲ့ လုပ်ရပ်မျိုး သုသုသွေးတို့ က မလုပ်သေးဘူး။

"ဟယ်... ဆောရီးနော်... ယူ့ သမီးလေးမှန်း မသိလို့ ပါ... သမီးရေ... ဆောရီးနော်... အန်တီ မသိလို့ ပြောမိတာပါ... စိတ်မဆိုးနဲ့ နော်..."

ဘယ်ရမလဲ... နှစ်ယောက်လုံးကြက်သေသေနေတုန်း ပြုံးပြုံးလေးပြောပြီးလှည့်ထွက်မယ်လုပ်ပြီးမှ ထပ်ပြီးတော့...

"သြော် ဒါနဲ့ ... နောက်လ ဆရာကန်တော့ပွဲနေ့ ညမှာ gathering dinner လဲလုပ်မှာသိလား... ယူ့ သမီးလေးရော ခေါ်ခဲ့နော်... သူငယ်ချင်း မိသားစုတွေ စုံကြတာပေါ့... သွားမယ်နော်..."

ကဲ... မှတ်ပလား... သမီးလောက်ဟာလေးရှိရဲ့ သားနဲ့  ငါ့ကိုလာပြီး ကပ်ချင်ဦး... အပျိုကြီးဆိုတဲ့ဂုဏ်ပုဒ်မှာ အားမနာလျှာမကျိုးပြောခွင့်ရတဲ့ အခွင့်အရေးလဲ ကပ်ပါထားပြီးသားပဲလေ။ ပြောရတာ အရသာရှိလိုက် တာနော်။ ကောင်တာမှာငွေရှင်းပြီး ကားဆီကိုပြန်အသွား ခြေလှမ်းတွေပေါ့ပါးလန်းဆန်းနေပုံများ... ဒေါက်ဖိနပ်ခွာသံလေးတောင် တခွပ်ခွပ်မြည်လို့ ။ဆိုင်ထဲအ၀င်တုန်းက ငိုင်တိုင်တိုင်ပုံစံနဲ့ များ ဘာဆိုင်လို့ လဲ... မင်္ဂလာပွဲသွားတုန်းက ခြေလှမ်းတွေထက်တောင် ယုံကြည်မှုပိုသေးတယ်။ ဒါကမှ တကယ့်အောင်နိုင်သူတစ်ယောက်ရဲ့  ခြေလှမ်းတွေပေါ့။ အမလေး... ကံကောင်းလို့ နော်... ဟိုမိန်းမရဲ့  စကားမှိုင်းတွေမိပြီး လူကတွေဝေသွားတော့မလို့ ... ရှယ်လီမြင့်ရေ... နင်ပြောသလို ငါကပဲ ကိုယ့်စိတ်တံခါးကိုယ်ပိတ်ထားတယ်ဆိုရင်တောင် ပိတ်ထားလက်စနဲ့  ကျေကျေနပ်နပ်ကြီး ဆက်ပိတ်ထားလိုက်ပါတော့ မယ် ကွယ်... ဒီအသက်အရွယ်ရောက်လို့  တံခါးပြန်ဖွင့်ခါမှ အိုကြီးအိုမ ကြောင်ပါးကြီးတွေနဲ့ တွေ့ နေရမှာထက်စာရင် တံခါးပိတ်ထားတဲ့ ငါ့ကမ္ဘာကျဉ်းကျဉ်းလေးက အများကြီး ပိုပြီးသာယာပါတယ်။

စိတ်လက်ပေါ့ပါးစွားနဲ့  ကားပေါ်တက်မယ်အလုပ်မှာမှ ဗိုက်ထဲက ဂွီ ခနဲ မြည်သံကို သတိထားလိုက်မိသည်... ဟုတ်သားပဲ... မနက်ကတည်းက ခုထိ ဘာမှ ဟုတ်တိပတ်တိမှ မစားရသေးပဲကိုး... ဟုတ်ပြီ... အိမ်ကို ဖုန်းဆက်လိုက်ဦးမယ်...

"မီးလုံးလား... တီသုပါ... ထမင်းစားနေပြီလား... ခဏလေးစောင့်နော်... ပုဇွန်ကင်နဲ့  ဂဏန်းကင် ၀ယ်လာမယ်လို့  ဖုန်းလှမ်းဆက်တာ... ဒါပဲနော်..."

ဖုန်းချအပြီး ဘေးပတ်ဝန်းကျင်ကိုကြည့်လိုက်တော့ လောကကြီးတခွင်က သာယာလို့ ပါလား... အသက်ရှူရတာတောင် ပိုပြီး လတ်ဆတ်နေသလိုပဲ။ ကဲ... ဆိုင်မှာ ရခိုင်မုန့် တီ စပ်စပ်လေး အပြတ်သွားစားမယ်... အပြန်ကျ မမအတွက် ပုဇွန်ကင် ၀ယ်သွားမယ်။ မီးလုံးအတွက်က ဂဏန်းကင်နဲ့  မုန့် လက်ဆောင်း...။ သြော်... မေ့တော့မလို့ ... ကီကီလေးအတွက်လဲ ငါးဖယ်ကြော် ၀ယ်သွားဦးမှ...။ ပြီးရင် ကီကီနဲ့  မီးလုံးကြိုက်တဲ့ kool ice-cream လဲ ၀င်ဝယ်လိုက်ဦးမယ်... အင်း... ဒီနေ့ တစ်နေ့ တော့ ကိုယ့်ကိုယ်ကို celebrate သေချာလုပ်ရမယ်။ ရခဲလှစွာသော လူ့ ဘ၀မှာ အမြတ်ဆုံးသော အပျိုကြီးဘ၀ကို လက်ဝယ်ပိုင်ဆိုင်ထားရမှန်း ကိုယ့်ကိုယ်ကို သတိပြုမိတဲ့ အထိမ်းအမှတ်ပေါ့ကွယ်.....။